القيصر كاظم الساهر ٦٧ سنة نجم في قمة الهرم يتصدر

زياد الخولي

بعيداً عن إنه لسه نجم ومطلوب وبأعلى الأسعار ف كافة مهرجانات الوطن العربى ولسه رونقه زى ما هوا مستمر من حيث الحضور والصوت والأداء
الراجل:
-صاين نفسه وسنه وتاريخه ولا يعانى من مراهقه متأخره.
– لا سمعنا عنه حاجه وحشه ولا ورط نفسه ف علاقه مع حد.
– مش محتاج يعمل نفسه تريند من لا شيئ وقافل على نفسه هو وعيلته ومستحيل تشوفه إلا ف حفله بس وشكرا على كدا.
– مش هتلاقيه موجود ع السوشيال ميديا ولا ف أحداث وتجمعات فنيه ع الفاضى والمليان.
– عمرنا ما شوفناه عامل ف نفسه حاجه غريبه أو مغير ف شكله حاجه ولا عمليات ولا حقن فيلر ولا عضلات اوفر وتقريباُ من كتر بساطته شكله ثابت مبيتغيرش ومش بيلبس غير بدلة كلاسيك ومش محتاج يعمل ف روحه أكتر من كدا.
– لا قالك أنا كبرت وخايف تروح عليا ومحتاج أعمل دوشة عشان أفضل موجود ولا ساب نفسه لحسابات الزمن الماسخ دا يغيره ف شيئ لا شخصياً ولا فنياً تحسه عايش ف زمنه الحلو ولسه محافظ على كل تفاصيله.
– جمهوره راقى وناس متعلمة كويس بتفهم لغة عربية فصحى وذوقها نضيف وكل الأجيال المثقفه بتعشقه وأتحداك لو جيبتلى سقطه بايخه على مسرح .
– مش هتحس بيه ع المسرح واقف ثابت متزن بيغنى ويمشى بكل هدوء ودبلوماسية كإنه وزير مش مجرد مطرب.
– تحسه مثقف واعى متحضر وعشان كدا نجح ف إنه يخلى الصوره لحد الوقت بيضاء وهيستمر لحد أخر لحظه والصورة بيضاء لا تشوبها شائبه.
مش بس برافو ومليون برافو
كاظم مدرسه تستحق كل الإحترام والتقدير والحب ونموذج يحتذى به ويتعلم منه إختار قبل ما يكون مطرب يبقى ((راجل))وقرر كإنسان يعيش بشكل مختلف بدون أن تتملك منه حسابات النجومية والشهرة